Tru og makt
Kristeleg Folkepartis historie 1933-2008
Kristendemokrati på norsk
Frå skipinga på Bibelskolen i Bergen 4. september 1933 til partiet fleire periodar har vore i regjering, ligg eit mylder av hendingar, episodar, ordskifte om strategi og verdival, meir eller mindre reinhårige personstridar.
Alt frå 1933 var partiet representert på Stortinget med markante personar, og i denne grundige partihistoria får vi eit usminka portrett av mange av dei. Fleirtalet i toppen har vore menn, men innimellom Nils Lavik, Erking Wikborg, Kjell Bondevik, Lars Korvald, Egil Aarvik, Kåre Kristiansen, Jon Lilletun, Kåre Gjønnes, Kjell Magne Bondevik og Dagfinn Høybråten, er det rydda brei plass også for kvinner som Elsa Skjerven, Bergfrid Fjose, Valgerd Svarstad Haugland, Hilde Frafjord Johnson og Laila Dåvøy.
Hovudvekta er lagd på å vise korleis partiet har definert oppgåva si, korleis det har presentert seg for veljarane gjennom partiprogram, slagord og logoar i skjeringspunktet mellom det kristelege og det politiske som er nedfelt i partiprogrammet. Framstillinga viser korleis partiets sjølvforståing har endra seg, parallelt med at kompromisset mellom tru og vilje til makt ofte har vore eit krevjande dilemma.
Boka er rikt illustrert, og i tillegg til tabellar med valresultat i 75-årsperioden, gjer fleire personregister og faktaopplysningar denne praktboka til eit autoritativt oppslagsverk om dette eineståande partiet.
