NJÅLSSOGA er den mektigaste, største og mest berømte av islendingesogene, og den blir rekna som eit av meisterverka i verdslitteraturen.
Dette er den første og einaste komplette utgåva av den mektige soga i norsk omsetjing.
Hovudpersonane i denne dramatiske, poetiske og bloddryppande forteljinga er den riddarlege helten og kjempa Gunnar frå Lidarende og hans trufaste venn og rådgjevar Njål Torgeirson. Gunnars vakre, men trulause hustru Hallgerd utløyser forviklingar som endar med at Gunnar døyr i einsam kamp mot ei stor overmakt. Andre del handlar om korleis Njål prøver å roe ned nye forviklingar, men Njål, kona Bergtora og sønene deira blir brende inne på Bergtorkvål.
Soga er truleg forfatta kring 1280, om lag 300 år etter at hendingane bar til. Verket byggjer på overlevering om ei rad historiske personar og tildragingar, som saman med litterære og folkloristiske lån og vandremotiv er støypte om til eit eineståande litterært kunstverk. Forteljinga utmerkjer seg like mykje ved komposisjon og personskildring som ved ein eineståande og monumental replikkunst.
